Հայաստանում հարցվածների մոտ 31 տոկոսը կարծում է, որ ոչ իշխանական ուժերի «եռյակը» («Բարգավաճ Հայաստան», ՀԱԿ եւ «Ժառանգություն» ), կարող է ձեւավորել ավելի լավ կառավարություն։ Այս մասին մարտի 2-ին մամուլի ասուլիսի ժամանակ հայտարարեց Հայաստանում Gallup International-ի ներկայացուցչության տնօրեն Արամ Նավասարդյանը՝ «Ընդդիմադիր ըլնեմ» խորագրով ցուցադրության ժամանակ ներկայացնելով հարցման արդյունքները։ Նշենք, որ հարցումն իրականացվել է Հայաստանում 2014թ. նոյեմբերի 20-27 ընկած հատվածում։ Հարցմանը մասնակցել է 1067 մարդ։
Նավասարդյանը նշել է, որ այն հարցին, թե իրենց կարծիքով ընդդիմադիր «եռյակը» կարող է արդյոք ձեւավորել ավելի լավ կառավարություն եւ բարելավել երկրի վիճակը, հարցվածների 5 տոկոսը պատասխանել է «միանշանակ այո», 26 տոկոսը՝ «ավելի շուտ այո», 32 տոկոսը՝ «ավելի շուտ ոչ», իսկ 20 տոկոսն էլ «միանշանակ ոչ» է պատասխանել։
«Այսպիսով՝ մոտավորապես 31 տոկոսը կարծում է, որ «եռյակը» կարող է ձեւավորել ավելի լավ կառավարություն, իսկ 52 տոկոսը կարծում է, որ նման բան չի կարող տեղի ունենալ»,- հայտարարեց Արամ Նավասարդյանը։