Նպատակահարմար չեմ համարում այս օրերին հակադարձել քաղաքական գործիչներին: Այս մասին «Ֆեյսբուքի» իր էջում գրել է «Հիմնադիր խորհրդարանի» ղեկավար Ժիրայր Սեֆիլյանը՝ անդրադառնալով մարտի 1-ին ՀԱԿ-ի հանրահավաքում Լեւոն Տեր-Պետրոսյանի ելույթին:
«Մեր ժողովուրդը հոգնել է անիմաստ սենսացիաներից: Դրա ժամանակը չէ: Մենք պետք է հնարավորինս շուտ ազգային պետություն կառուցենք եւ դառնանք միջազգային հարաբերությունների լիարժեք սուբյեկտ: Իսկ դրա համար հարկավոր է նախ հեռացնել ռեժիմին եւ երկրում հաստատել մեր ժողովրդի կամքն ու իշխանությունը: Հապաղելու դեպքում կարող ենք ամեն ինչ կորցնել: Ուստի բոլոր լուրջ եւ մտահոգ մարդկանց կոչ եմ անում օր առաջ լծվել ժողովրդի համախմբման եւ ռեժիմի հեռացման գործին»,-գրել է նա:
Նշենք, որ Լեւոն Տեր-Պետրոսյանը իր ելույթում հեգնանքով նշել է հետեւյալը. «Եվ վերջում, հայ ժողովրդի մոտալուտ փրկության մասին ձեզ լիակատար պատկերացում տալու համար, ինձ մնում է միայն գաղտնազերծել այդ նոր միասնական ընդդիմության կոդավորած ստրատեգիական պլանը. Դավալուից ցախավելը հեծած, «մեկ պլյուս մեկ» քայլերգը շուրթերին եւ Պուտինի հրաժարականի պահանջը կրծքի տակ, հասնում են Ազատության հրապարակ, ինքնահռչակվում որպես նոր բեւեռ, ստորագրում քաղաքացիական պայմանագիրը, եւ շարժվելով դեպի Բաղրամյան 26, կյանքի կոչում «100-ամյակն առանց ռեժիմի» կարգախոսը։ Կարծում եմ, հասկացողը հասկացավ, իսկ չհասկացողն այս հաղթական երթը շուտով իր աչքով կտեսնի»,-նշել է առաջին նախագահը։