5 տարի ժամկետով ազատազրկման դատապարտված դերասան Վարդան Պետրոսյանի գործով դատախազը բողոք է ներկայացրել Վերաքննիչ դատարան պարզապես բողոք բերելու համար: Այս մասին NEWS.am-ի թղթակցի հետ զրույցում ասաց Վարդան Պետրոսյանի փաստաբանը՝ Նիկոլայ Բաղդասարյանը:
Դատախազը պահանջում է Վարդան Պետրոսյանին ազատազրկել ավելի խիստ պատիժով: Նիկոլայ Բաղդասարյանը նշեց, որ 2 եւ ավելի մահվան ելքով վթարների դեպքում նախատեսվում է պատիժ 4-10 տարի ժամկետով, եւ դատախազը պետք է պատճառաբանի, թե ինչու է պահանջում 6 տարի ազատազրկում եւ ոչ թե 4, մինչդեռ նրա բողոքում ոչ մի պատճառաբանություն չկա:
Ի դեպ, փաստաբանը նաեւ տեղեկացրեց, որ դերասանի դեմ հարուցված քրեական գործի շրջանակում քննիչի կողմից փաստաթղթերի կեղծման եւ անգործության փաստերով ՀՔԾ-ն մերժել էր քրեական գործ հարուցել: Այժմ փաստաբանը դիմել է Գլխավոր դատախազին՝ պահանջելով վերացնել այդ որոշումը, քանի որ խախտվել են ժամկետները: Նիկոլայ Բաղդասարյանը նշեց, որ եթե Գլխավոր դատախազն էլ չվերացնի այդ ոչոշումը, իրենք դիմելու են դատարան եւ իրենց ձեռքի տակ եղած ապացույցները ներկայացնելու են այդտեղ:
Հիշեցնենք, որ 2013 թվականի հոկտեմբերի 20-ին, ժամը 21:20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար են բախվել: Պատահարի արդյունքում 7 մարդ մարմնական վնասվածքներով տեղափոխվել է հիվանդանոց, այդ թվում՝ դերասան Վարդան Պետրոսյանը: Ավելի ուշ Էդգար եւ Էդուարդ Հակոբյան եղբայրները մահացել են:
Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման: