Ռուսաստանցի ընդդիմադիր քաղաքական գործիչ Բորիս նեմցովի սպանության գործով միակ ականատես Աննա Դուրիցկայան Մոսկվայից մեկնել է Կիեւ: Այս մասին «Ինտերֆաքսին» հայտնել է Ուկրաինայի ԱԳՆ մամուլի քարտուղար Եվգենի Պերեբիյնիսը: Նրա խոսքով՝ Դուրիցկայային ուղեկցում է նրա փաստաբանը:
«Մոսկվայում Ուկրաինայի դեսպանատունն ապահովել է բոլոր անհրաժեշտ պայմանները՝ նրա Ուկրաինա վերադառնալու համար»,-ասել է նա:
Ավելի վաղ Աննայի փաստաբան Վադիմ Պրոխորովը հայտնել էր, որ Դուրիցկայան ստի դետեկտոր չի անցնի ՌԴ քննչական կոմիտեում՝ ծանր հոգեբանական վիճակի պատճառով:
Մարտի 2-ին Դուրիցկայան հայտնել էր, որ իրեն հատկացված պահակախումբն իրեն ոչ մի տեղ թույլ չի տալիս գնալ: «Ես չեմ կարողանում որեւէ տեղ դուրս գալ: Ամենայն հավանականությամբ, ես չեմ գնա հուղարկավորությանը»,-ասել է աղջիկը: Ավելի ուշ նա նշել է, որ չի գնա հրաժեշտ տալու Նեմցովին, քանի որ «անձամբ է այդպիսի որոշում կայացրել»: