Ինդոնեզացի փրկարարները հայտարարել են AirAsia ավիաընկերությանը պատկանող, աղետի ենթարկված օդանավի զոհերի որոնման լայնմասշտաբ գործողության ավարտի մասին: Օդանավն աղետի էր ենթարկվել նախորդ տարվա դեկտեմբերին, Ճավայի ծովում: Սակայն Jakarta Post թերթի էլեկտրոնային տարբերակի փոխանցմամբ՝ առաջիկա երկու շաբաթներին դեռ որոշակի աշխատանքներ կշարունակվեն:
Ավելի վաղ նշվել էր, որ թեեւ ոչ բոլոր զոհերի մարմիններն են հայտնաբերվել, որոնողական աշխատանքները կդադարեցվեն եւ հարազատները ստիպված կլինեն ընդունել դա:
AirAsia ընկերության օդանավը դեկտեմբերի 28-ին թռիչքից մոտավորապես 40 րոպե անց անհետացել է ռադարների էկրաններից՝ գտնվելով Կալիմանտան (Բոռնեո) կղզու շրջանում: Ավիաընկերության տվյալներով՝ A320200ում եղել Է 162 մարդ. 155 ուղեւոր (այդ թվում՝ 17 երեխա) եւ երկու օդաչու, օդանավի ինժեները եւ օդանավի չորս ուղեկցորդները: Նրանցից 155 հոգի Ինդոնեզիայի քաղաքացիներ են, երեքը՝ հարավկորեացիներ, մեկը՝ Մեծ Բրիտանիայի հպատակ, մեկը Մալայզիայի հպատակ եւ Սինգապուրի եւ Ֆրանսիայի (երկրորդ օդաչուն) մեկական քաղաքացիներ: