Գյումրիում Ավետիսյանների 7 հոգանոց ընտանիքի սպանության մեջ մեղադրվող ռուս զինծառայող Վալերի Պերմյակովի նկատմամբ հայկական կողմը դատահոգեբուժական փորձաքննություն չի նշանակել: Այս մասին NEWS.am-ի թղթակցի հետ զրույցում ասաց Ավետիսյանների իրավահաջորդների ներկայացուցիչ, փաստաբան Երեմ Սարգսյանը: Մենք խնդրեցինք Երեմ Սարգսյանին մեկնաբանել լրատվամիջոցներում տարածված տեղեկությունները, որ Վալերի Պերմյակովը դատահոգեբուժական փորձաքննության արդյունքում ճանաչվել է մեղսունակ:
«Պաշտոնական նման տեղեկություն չունեմ։ Հայկական կողմը նման փորձաքննություն չի նշանակել։ Խոսքը ռուսական գործի մասին է, որի շրջանակներում, ըստ տեղեկությունների, այդ եզրակացությունը ստացվել է։ Ես նույնպես նման տեղեկություններ ունեմ, բայց ոչ պաշտոնապես։ Համենայն դեպս եթե նման եզրակացություն իրոք կա, ապա ես չեմ զարմանում, քանի որ բազմիցս եմ նշել, որ կատարված գործողությունները վկայում էին միայն գիտակցված և մտածված գործողությունների մասին, ինչը իրական հիմքեր էր տալիս կարծելու, որ նա հանցանքի կատարման պահին անմեղսունակ չի եղել»,-ասաց Երեմ Սարգսյանը։
Փաստաբանը նշեց, որ հայկական կողմը նման փորձաքննություն չի նշանակել, իսկ ռուսական քննության կողմից նշանակված փորձաքննությունների եւ դրանց եզրակացությունների մասին պաշտոնական տեղեկատվություն չկա, քանի որ ռուսական կողմից քննվող գործում ներգրավված չեն:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել հիվանդանոց, սակայն դեպքից 7 օր անց հիվանդանոցում մահացել էր նաեւ նա: Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում: Հայաստանի Գլխավոր դատախազ Գեւորգ Կոստանյանը փետրվարի 3-ին նամակով դիմել էր Ռուսաստանի գլխավոր դատախազ Յուրի Չայկային՝ Ավետիսյանների ընտանիքի սպանության գործի վարույթը Հայաստանի իրավապահ մարմիններին փոխանցելու վերաբերյալ միջնորդությամբ: