Ազգային ժողովի «Բարգավաճ Հայաստան» խմբակցության պատգամավոր Մելիք Մանուկյանը՝ Շշի Մելոն, հետ է վերցրել մանդատից հրաժարվելու իր դիմումը: Այս մասին այսօր՝ մարտի 3-ին, Ազգային ժողովի արտահերթ նիստի ժամանակ հայտարարել է ԱԺ նախագահ Գալուստ Սահակյանը:
Ավելւ վաղ հայտնել էինք, որ ԲՀԿ-ից դուրս գալու ու որպես անկախ պատգամավոր գործունեություն ծավալելու մասին արդեն հայտարարել է Արագած Ախոյանը, Կարո Կարապետյանը, Հարություն Ղարագյոզյանը, Գրիգորի Մարգարյանը, Դավիթ Քոչարյանը, Մուշեղ Պետոյանը:
Մեկ այլ ԲՀԿ-ական պատգամավոր՝ Մելիք Մանուկյանը, սխալմամբ մանդատից հրաժարվելու դիմում էր գրել, սակայն առաջիկայում պատրաստվում է հետ վերցնել այդ դիմումը եւ պարզապես դուրս գալ ԲՀԿ-ից՝ խմբակցության կազմում մնալով որպես անկախ պատգամավոր: NEWS.am-ի թղթակիցը զանգահարել էր նրան՝ փորձելով պարզել՝ արդյոք սխալվել է մանդատից հրաժարվելու մասին դիմում ներկայացնելով եւ երբ է պատրաստվում հետ վերցնել այն: «Ո՞վ է ասել, ես չեմ ուզում քո հարցերին պատասխանել ազիզ ջան»,-ասել էր պատգամավորը՝ անջատելով հեռախոսը եւ այլեւս չպատասխանելով մեր զանգերին:
