ՌԴ Պետդումայի մի քանի պատգամավորներ առաջարկել են կառավարությունում ստեղծել ազգությունների հարցերով նախարարություն: Այս մասին գրում է «Իզվեստիա» պարբերականը:
Ռուսաստանի նախագահին ներկայացվելիք համապատասխան դիմումը պատրաստել են Ռուսաստանի Դաշնության կոմունիստական կուսակցության պատգամավորներ Վալերի Ռաշինն ու Սերգեյ Օբուխովը: Ըստ նրանց՝ նոր գերատեսչությունը կարող է դառնալ Ռուսաստանում բնակվող 180 ազգերի եւ ժողովուրդների միավորման հիմքը:
Օրինագծի հեղինակները պնդում ե ն, որ Ռուսաստանում էթնիկական տարաձայնությունների մակարդակը շատ բարձր է, ինչի հետեւանքով ոչ ռուս ժողովուրդների հանդեպ ատելություն է առաջանում:
Պատգամավորները ուշադրություն են հրավիրում այն հանգամանքի վրա, որ ազգայնականության միտումը դեռեւս 1990-ական թթ. նկատվում էր Թաթարստանում, Բաշկիրիայում, Հյուսիսային Կովկասի մի շարք պետություններում, Ուրալում եւ Սիբիրում:
Պարբերականը հիշեցնում է, որ ազգությունների հարցով առանձին գերատեսչություն ստեղծելու գաղափարը առաջ էր քաշվել «Համառուսական ազգային ճակատ» կուսակցության նախընտրական ծրագրում, որի հետ «Եդինայա Ռոսիյան» 2011թ. գնում էր ընտրությունների:
Պարբերական հղում է կատարում անցկացված հարցման արդյունքներին, որոնց համաձայն՝ ռուսաստանցիների 76 տոկոսը թշնամանք չի տածում այլ ազգերի նկատմամբ, իսկ 17 տոկոսը նշել է, որ թշնամանք է տածում այլ ազգերի ներկայացուցիչների հանդեպ:
