Փետրվարի 27-ի երեկոյան ՊԲ հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետում, ըստ նախնական վարկածի, ինքնասպանություն գործած զինծառայող, Երեւանի բնակիչ, 19-ամյա Ալբերտ Սաֆարյանի հուղարկավորությունը տեղի կունենա այսօր՝ մարտի 3-ին: Այս մասին NEWS.am-ին ասաց մահացած զինծառայողի հարեւաններից Արսեն Գալստյանը:
Նրա խոսքով՝ Ալբերտի հարազատները ԶԼՄ-ներից տեղեկացել են, որ այս գործով 3 ձերբակալված զինծառայող կա, սակայն իրենք մանրամասներ չգիտեն:
«Ծնողները, հարազատները հիմա սգի մեջ են, չեն հավատում ինքնասպանության վարկածին, բայց հուղարկավորությունից հետո դեպքի մանրամասները պարզելու են: Հայրն ասել է՝ ամեն ինչ անելու է ճշմարտությունը պարզելու համար»,- ասաց Արսեն Գալստյանը:
Նա հայտնեց նաեւ, որ Ալբերտի հոգեհանգստին մասնակցել են բարձրաստիճան պաշտոնյաներ, որոնք, սակայն, դեպքի մասին որեւէ մանրամասներ չեն ասել:
Ավելի վաղ NEWS.am-ը հայտնել էր, որ 2015թ.-ի փետրվարի 27-ին, ժամը 20:40-ի սահմաններում, N զորամասի պահպանության տակ գտնվող մարտական դիրքում, նույն զորամասի ժամկետային զինծառայող, շարքային Ալբերտ Էմիլի Սաֆարյանը, ըստ նախնական տվյալների, իրեն ամրակցված ինքնաձիգով մահացու հրազենային վնասվածք է հասցրել ինքն իրեն՝ ստորին ծնոտի շրջանում:
Այս գործով ձերբակալվել են վաշտի ավագ, ենթասպա Արայիկ Սուքիասյանը, ժամկետային զինծառայողներ՝ շարքային Գեւորգ Ղազարյանը եւ կրտսեր սերժանտ Միհրան Հովակիմյանը։
Ժամկետային զինծառայողները կասկածվում են ՀՀ քրեական օրենսգրքի 359-րդ հոդվածի 1-րդ մասով և 359-րդ հոդվածի 2-րդ մասի 2-րդ կետով նախատեսված հանցագործություններ կատարելու մեջ, իսկ վաշտի ավագը՝ ՀՀ քրեական օրենսգրքի 358.1 հոդվածի 2-րդ մասով նախատեսված հանցագործություն կատարելու մեջ: