Հայաստանի ընդդիմությունը չունի գաղափարական հիմք, իսկ պայքարը, որը չունի գաղափարական հիմք, չի կարելի համարել քաղաքական: Այս մասին, այսօր՝ մարտի 3-ին, ԱԺ-ում հայտարարել է պաշտպանության նախկին փոխնախարար Վահան Շիրխանյանը:
Նրա համոզմամբ՝ պայքարը գնում է միայն իշխանությունը վերցնելու համար: Վահան Շիրխանյանը չի կարծում, որ Հայաստանում գոյություն է ունեցել ընդդիմություն: «Ընդդիմությունը քաղաքական կառույց է՝ հիմնված գաղափարական դրույթների վրա»,-նշել է նա:
Ասուլիսի մյուս բանախոսը՝ ՀՀԿ խմբակցության պատգամավոր Լեռնիկ Ալեքսանյանը չհամաձայնեց Շիրխանյանի հետ՝ նշելով, որ ընդդիմությունը միշտ եղել է եւ կլինի: «Հարցն այն է, թե ինչ առանցքի շուրջ է միավորվում այդ ընդդիմությունը: Եթե կա իշխանություն, կա նաեւ նրանից դժգոհ զանգված: Եթե գոյություն ունի դժգոհ զանգված, նշանակում է կա նաեւ ընդդիմություն: Եթե ընդդիմադիր կուսակցությունները միավորվեն միասնական նպատակների շուրջ, հասարակությունը կհավատա նրանց»,-ասել է պատգամավորը:
Նրա խոսքով՝ հայաստանյան ընդդիմության սխալն այն է, որ այդ ուժերը չկարողացան նպատակ դնել, նրանցից յուրաքանչյուրն իր նպատակներն ուներ:
