ԲՀԿ-ն դրական է գնահատում «Շրջանառության հարկի» մասին օրենքի նոր փոփոխությունները, բայց իրենց աջակցության մասին չի հայտարարում: Այս մասին այսօր՝ մարտի 3-ին, ԱԺ-ում հայտարարել է ԲՀԿ խմբակցության պատգամավոր Ստեփան Մարգարյանը:
Նրա խոսքով՝ նոր օրինագծի գաղափարախոսությունը կտրուկ տարբերվում է նախորդից, եւ դա ուրախացնում է: Մարգարյանը հավելել է, որ այս փոփոխությունները սկզբունքային են, որոնց համաձայն ԱԱՀ-ի շեմը 58,3 մլն դրամից հասցվել է 113,4 մլն դրամի եւ հնարավորություն է առաջացել գործունեությունը ծավալել եւ փաստաթղթաշրջանառությամբ, եւ առանց դրա:
«Շատ կարեւոր է, որ այդ երկու գործարքների հարկահավաքման միջեւ 4 տոկոսի տարբերություն է նախատեսված, իսկ դա նշանակում է, որ փոքր բիզնեսը կզգա իր շահը եւ կսկսի հաշիվ-ապրանքագրեր պահանջել խոշոր բիզնեսից, որպեսզի ավելի քիչ հարկ վճարի»,-հայտարարել է Մարգարյանը:
Ինչ վերաբերում է շեմին, Մարգարյանը նշել է, որ ԲՀԿ-ն բազմիցս հայտարարել է, որ փոքր բիզնեսի շրջանառությունը պետք է լինի տարեկան գոնե 120 մլն դրամ կամ ամսական 10 մլն դրամ, որպեսզի ապահովի գոնե 1 մլն դրամի հասույթ:
Այդուհանդերձ, ԲՀԿ-ն դեռեւս իր կարծիքը չի ձեւավորել օրինագծի վերաբերյալ: Դրա վրա կազդեն նաեւ ՓՄՁ-ների ներկայացուցիչների հետ հանդիպումները: