Ազգային ժողովի «Բարգավաճ Հայաստան» խմբակցության պատգամավոր Ռուստամ Գասպարյանը կուսակցությունից դուրս գալու դիմում է գրել: Այս մասին հայտնեցին NEWS.am-ի ԱԺ-ի աղբյուրները: Պատգամավորից հնարավոր չեղավ ճշտել տեղեկության իսկությունը, նա հեռախոսազանգերին չի պատասխանում: Թեեւ առավոտյան մեզ հետ զրույցում ասել էր, որ այսօր որոշում կկայացնի եւ հայտարարությամբ հանդես կգա: Ըստ երեւույթին՝ նա դե ֆակտո կմնա խմբակցության կազմում, բայց գործունեություն կծավալի որեպս անկախ պատգամավոր:
Իսկ ԲՀԿ խմբակցության քարտուղար Նաիրա Զոհրաբյանն էլ մեզ հետ զրույցում ասաց, որ նման տեղեկատվություն չունի:
Ավելի վաղ հայտնել էինք, որ ԲՀԿ-ից դուրս գալու ու որպես անկախ պատգամավոր գործունեություն ծավալելու մասին արդեն հայտարարել է Արագած Ախոյանը, Կարո Կարապետյանը, Հարություն Ղարագյոզյանը, Գրիգորի Մարգարյանը, Դավիթ Քոչարյանը, Մուշեղ Պետոյանը: Իսկ Մելիք Մանուկյանն էլ հետ է վերցրել մանդատից հրաժարվելու մասին իր դիմումը:
