Իրանի Իսլամական Հանրապետությունը Վաշինգտոնին զիջումներ չի անի միջուկային ծրագրի շուրջ բանակցություններում։ Այս մասին երեքշաբթի Շվեյցարիայի Մոնտրյո քաղաքում հայտարարել է Իրանի արտգործնախարար Մուհամմադ Ջավադ Զարիֆը։
«Իրանը երբեք չի զիջի անտրամաբանական ու չափն անցնող պահանջների առաջ, որոնք Իրանի միջուկային ծրագրի շուրջ բանակցություններում առաջ է քաշում հակառակ կողմը»,- մեջբերում է նախարարի հայտարարությունը ԻՐՆԱ գործակալությունը։
Զարիֆի ելույթը պատասխան էր, որը հաջորդել էր ԱՄՆ նախագահ Բարաք Օբամայի հայտարարությանը այն մասին, թե հանրապետությունը պետք է համաձայնվի 10 տարով սառեցնել իր միջուկային գործողությունները։ Նախարարը նաեւ նշել է, որ նման հայտարարությունները չեն կարող սասանել խաղաղ միջուկային տեխնոլոգիաներ մշակող իրանցի ժողովրդի կամքը, տեղեկացնում է ՏԱՍՍ-ը։
«Բանակցությունները Իրանի միջուկային խնդիրը կարգավորելու միակ ճանապարհն է, եւ դրան այլընտրանք գոյություն չունի»,- նշել է Զարիֆը։
