«Բանդայի գործով» ամբաստանյալ, արդեն 3.5 տարի ազատազրկման մեջ գտնվող Քյարամ Ամոյանին մի քանի օր առաջ են տեղափոխել «Նուբարաշեն» հոգեբուժարան՝ դատահոգեբուժական փորձաքննության: Այս մասին NEWS.am-ին ասաց ամբաստանյալի փաստաբան Սամվել Հովհաննիսյանը:
Նա նշեց, որ թեեւ փորձաքննություն նշանակելու որոշումը կայացվել է փետրվարի 6-ին, Քյարամին հոգեբուժարան են տեղափոխել մի քանի օր առաջ:
«Փորձաքննությունը դեռ նոր է անցկացվում: Բայց վիճակը լավ չէ, նույնիսկ հոգեբուժարան տեղափոխելու օրն է վատացել»,- ասաց Սամվել Հովհաննիսյանը:
Նշենք, որ 2014թ.-ի մայիսի 7-ին հաշվի առնելով դատաբժշկական փորձաքննության արդյունքները՝ Կենտրոն եւ Նորք Մարաշ ընդհանուր իրավասության դատարանը որոշել էր Քյարամ Ամոյանի մասն առանձնացնել եւ 6 ամսով հետաձգել քննությունը: Նոյեմբերի 10-ին քննությունը վերսկսվել է:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցավորության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Դավիթ Գալստյանը, Արթուր Մանուկյանը եւ Սամվել Դավթյանը դատապարտվել են 11-15 տարվա ազատազրկման: