Բրիտանացի հետազոտողների խումբը վերջին 9 տարիներին պեղումներ է կատարել Նազարեթ քաղաքում եւ հայտնաբերել այն վայրը, որտեղ կյանքի առաջին տարիներն է անցկացրել Հիսուս Քրիստոսը:
Ռեդինգի համալսարանի հնագետները գիտական ամսագրերից մեկում հրապարակած հոդվածում գրել են, որ իրենց հաջողվել է հայտնաբերել այն տունը, որտեղ, ամենայն հավանականությամբ, ծնվել եւ մեծացել է Հիսուսը:
Հարկ է նկատել, որ մինչեւ 2006 թվականը գիտնականները չէին համարձակվում ճշտել, թե որտեղ է գտնվում Մարիամի եւ Հովսեփի բնակարանը: Չնայած տան գտնվելու վայրի մասին անկախ հնագետները նկարագրություն են թողել դեռեւս XIX դարի վերջին:
Ըստ Informing-ի, Մեծ Բրիտանիայից հնագետ Քեն Դարքը նկարագրել է, թե ինչպես են անցկացվել պեղումները, եւ նույնիսկ հայտնաբերված բնակավայրի լուսանկարներ է հրապարակել:
Գիտնականը նաեւ կարծիք է հայտնել, որ երբ Հիսուսը Մարիամի եւ Հովսեփի հետ հեռացել է Նազարեթից, գրեթե անմիջապես նրանց տան տեղում տաճար են կառուցել, շուրջը՝ գերեզմանոց:
Դարքը նաեւ գրել է, որ իրենց ենթադրության իսկությունը կապացուցեն միայն ժամանակն ու ավելի մանրամասն հետազոտությունը: Բացի այդ, հնագետները դեռեւս չեն ավարտել աշխատանքը:
