Ավստրալական Նոր Հարավային Ուելսի ափերին ձկնորսը խորը ջրերում բնակվող հազվագյուտ տեսակի ձուկ՝ գոբլին-շնաձուկ է որսացել:
Ըստ Business Insider Australia-ի, շնաձկան այս տեսակը, որը նաեւ «ծովի դինոզավր» անունն է ստացել, չափազանց արտասովոր ծնոտային համակարգ ունի: Երբ շնաձկան ծնոտները բացվում են, բերանի խոռոչի հանգույցները տեղաշարժվում են եւ երախը կարծես առաջ է գալիս:
Ըստ Lifenews-ի, գիտնականները նշում են, որ քթի հատվածում գոյություն ունեցող ելուստը մեծ քանակությամբ էլեկտրազգայուն բջիջներ է պարունակում, ինչը գիշատչին հնարավորություն է տալիս խորը ջրերում մթության մեջ զգալ պոտենցիալ զոհին:
Ձկնորսի բռնած շնաձուկը փոխանցել են Սիդնեյի Ավստրալական թանգարանին, սակայն նրան կենդանի պահել, ցավոք, չի հաջողվել: Թանգարանի աշխատակիցները նշել են, որ շնաձուկն արու է, ընդ որում, համեմատաբար ոչ շատ մեծ՝ 1.26 մետր երկարությամբ: Մինչդեռ այս տեսակի երկարությունը կարող է հասնել մինչեւ 3.7 մետրի:
Ձկնորս Մայք Քելլին ասել է, որ նման շնաձկներ, թեկուզ ոչ շատ հաճախ, բայց իր ցանցում էլի են հայտնվել. «Իմ ամբողջ կյանքի ընթացքում 12 անգամ նման շնաձուկ եմ որսացել»:
