Աշխատանքային օրվա ավարտից հետո աշխատանքի հետ կապված SMS հաղորդագրություն կամ էլեկտրոնային նամակ ստացող մարդիկ զայրույթ են զգում: Դա կարող է բացասական ազդեցություն ունենալ նրանց անձնական կյանքի վրա:
Թեխասի համալսարանի գիտնականները 7 օր շարունակ հետեւել են 341 աշխատողների: Հետազոտողները պարզել են, թե ինչ զգացողություններ են ունեցել փորձի մասնակիցները, երբ գրասենյակից դուրս աշխատանքի պատճառով էլեկտրոնային փոստ են բացել: Նման դեպքերում գործընկերոջ հետ զրույցը բացասական երանգ է ունեցել կամ անձից շատ ժամանակ է խլել:
Ըստ Meddaily-ի, գիտնականները հետազոտության մասնակիցներին 2 ենթախմբի են բաժանել. սեգմենտորներ եւ ինտեգրատորներ: Առաջինները ձգտել են աշխատանքը սահմանազատել անձնական կյանքից: Նրանց վրա ոչ աշխատանքային ժամերին աշխատանքի մասին հիշատակումներն ավելի վատ են անդրադարձել:
Իսկ ինտեգրատորները միշտ ցանկացել են տեղյակ լինել, թե ինչ է կատարվում աշխատավայրում: Նրանք նույնպես ազատ ժամանակ աշխատանքային նամակ ստանալիս բարկացել են, բայց նրանց անձնական կյանքին դա չի խանգարել:
Միաժամանակ, ոչ աշխատանքային ժամերին աշխատավայրից դրական լուրեր ստացող մարդիկ ուրախության զգացողություն են ունեցել, իհարկե՝ կարճատեւ:
