Հայոց ցեղասպանության 100-րդ տարելիցին նվիրված՝ Եվրոպական ժողովրդական կուսակցության ընդունած բանաձեւը շատ կարեւոր, աննախադեպ փաստաթուղթ է։ Այդ մասին Ազգային Ժողովում հայտարարել է փոխնախագահ Էդուարդ Շարմազանովը։
ԱԺ փոխնախագահը շնորհակալություն է հայտնել Եվրոպական ժողովրդական կուսակցությանը Հայոց ցեղասպանության 100-րդ տարելիցին նվիրված բանաձեւի ընդունման համար:
«Ուզում եմ բոլորիս անունից շնորհակալություն հայտնել Եվրոպայի ժողովրդական կուսակցության ներկայացուցիչներին 100-րդ տարելիցին ընդառաջ նման բանաձեւ ընդունելու կապակցությամբ: Բանաձեւում հստակ ամրագրված է համահայկական հռչակագրի ոգին, որտեղ հստակ նշված է ցեղասպանության եւ հայրենազրկում եզրույթները: Կոչ է արվում թե Թուրքիային, թե եվրոպական միջազգային կառույցներին դատապարտելու հայոց ցեղասպանությունը»,- նշել է Շարմազանովը:
Նա նկատել է, թե բանաձեւը շատ կարեւոր, աննախադեպ փաստաթուղթ է, եւ այս փաստաթուղթը չէր լինի, եթե չլիներ «Ժառանգության», «Օրինաց երկրի» եւ Հայաստանի Հանրապետական կուսակցությունների միասնական աշխատանքը։ Նման կերպ մենք ապացուցում ենք, որ որտեղ հայը, հայ քաղաքական միտքը միասնական է, այնտեղ մենք արձանագրում ենք հաջողություն»,-ասաց Շարմազամովը: