Փոխարժեքի տատանումներից ԱՊՀ երկրներում երկաթուղու միջազգային տոմսերի գները չպետք է շատ թանկանան։ Այս մասին փետրվարի 4–ին Երեւանում ԱՊՀ երկրների երկաթուղային փոխադրամիջոցների Ուղեւորային տնտեսության խորհրդի նիստում լրագրողներին հայտնեց «Ռուսական երկաթուղիներ» ԲԲԸ ուղեւորատար փոխադրումների դեպարտամենտի պետ Գենադի Վերխովիխը՝ մեկնաբանելով շվեյցարական ֆրանկի փոխարժեքի տատանումները, որի հետ անմիջականորեն կապված են երկաթուղային սակագները։
2015թ. հունվարի կեսին շվեյցարական ֆրանկը ԱՄՆ դոլարի հանդեպ կտրուկ աճ էր գրանցել՝ հասնելով 1.17-ի։ Փետրվարին այն նորից նվազել էր եւ այս պահին ֆրանկի փոխարժեքը կազմում է 1.04 ֆրանկ մեկ դոլարի դիմաց։
«Տատանումները թողնում են իրենց ոչ դրական հետեւանքը։ Այսօր հետխորհրդային տարածքում եւ Եվրոպայի հետ ուղեւորային փոխադրումները նվազել են։ Այդ պատճառով «Ռուսական երկաթուղիների» դուստր ձեռնարկությունը՝ «Դաշնային ուղեւորային ընկերություն» ԲԲԸ-ն, գործընկերների հետ պայմանագրեր է կնքում սակագների նվազեցման համար։ Սահմանակից երկրների մեր գործընկերները ըմբռնումով են մոտենում դրան։ Օրինակ՝ Բելառուսի հետ տարբեր գնացքներում սակագինը մինչեւ 30 տոկոսով նվազեցնելու պայմանագիր ենք կնքել։ Նման աշխատանքներ ենք տանում նաեւ Մերձբալթյան երկրների հետ»,- նշեց Վերխովիխը։
Նշենք, որ հայկական կողմից նիստին մասնակցում էր ՀՀ տրանսպորտի եւ կապի փոխնախարար Արթուր Առաքելյանը եւ Հայաստանի երկաթուղային ընկերությունները կառավարող «Հարավկովկասյան երկաթուղի» ՓԲԸ ղեկավարությունը։