ԱՄՆ նախագահ Բարաք Օբաման եւս մեկ տարով երկարեցրել է Ռուսաստանի որոշ քաղաքացիների ու ընկերությունների դեմ նախկինում սահմանած պատժամիջոցների ժամկետը՝ կապված Ուկրաինայում ստեղծված իրավիճակի հետ: Այս մասին ասվում է Սպիտակ Տան մամուլի ծառայության հաղորդագրությունում, որը տարածվել է մարտի 3-ին:
Ամերիկյան վարչակազմը ճշտել է, որ խոսքը ԱՄՆ կառավարության կողմից նախորդ տարվա մարտի 6-ին, 16-ին եւ 20-ին, ինչպես նաեւ դեկտեմբերի 19-ին սահմանված պատժամիջոցների մասին է:
Այդ պատժամիջոցները վերաբերել են ՌԴ մի շարք քաղաքացիների, այդ թվում պաշտոնատար անձանց, նաեւ Ուկրաինայի նախկին նախագահ Վիկտոր Յանուկովիչի կառավարության անդամների: Պատժամիջոցների տակ են հայտնվել նաեւ ռուսաստանցի մի շարք գործարարներ, ընկերություններ, նաեւ Դոնեցկի եւ Լուգանսկի ղեկավարությունը:
