Հայաստանի հատուկ ծառայությունները իրենց ուժերի մեծ մասն ուղղում են ոչ թե հակահետախուզությանը, այլ ընդդիմության լրտեսությանը։ Այս մասին մարտի 4-ին խորհրդարանում հայտարարել է Հայ ազգային կոնգրես խմբակցության ղեկավար Լեւոն Զուրաբյանը։
«Հատուկ ծառայություններն ամբողջովին հսկողության տակ են վերցրել այլախոհ քաղաքական ուժերին՝ կոպիտ կերպով խախտելով օրենսդրությունը։ Եթե այդ ներուժն ու ֆինանսավորումը ուղղվեր հակառակորդին հսկելուն, մենք այսօր բոլորովին այլ իրավիճակում կլինեինք»,- հավելել է պատգամավորը։
Նա հիշեցրել է, որ ԲՀԿ անդամ, ՀՀ նախկին արտգործնախարար Վարդան Օսկանյանի հետ իր խոսակցության գաղտնալսման գործի հետաքննությունը մինչ օրս տեղից չի շարժվել։
«Հիշում եմ, ամենասկզբում ես ասացի քննիչին, թե պետք չէ իզուր չարչարվել. բոլոր հետքերը տանում են Հայաստանի հատուկ ծառայություններին։ Սակայն քննիչը լավատես էր եւ ասաց, որ հանցագործները հստակ հետքեր են թողել, եւ կհայտնաբերվեն։ Ես նրանից մինչեւ հիմա այլեւս ոչ մի բան չեմ լսել»,- հայտարարել է Զուրաբյանը։