Օքսֆորդի համալսարանի Մերձավորարեւելյան հետազոտությունների կենտրոնի տնօրեն Յուջին Ռոգանն իր «Օսմանյան կայսրության անկումը» գրքում, որը նվիրված է Առաջին աշխարհամարտին, «Հայերի ոչնչացումը» անվանումով բաժին է ներառել: Այս մասին գրում է «The Guardian»-ը:
Պարբերականը գրում է. «Գրքում այդ բաժնի՝ «Հայերի ոչնչացումը» վերնագրի ընտրությունը չի ավելացնի թուրքերի շրջանում Ռոգանի ընկերների թիվը, որոնք շարունակում են ժխտել Հայոց ցեղասպանությունը: Դրանում հստակ նկարագրվում է Թալեաթ փաշայի եւ նրա երկու խորհրդականների՝ դոկտոր Մեհմեթ Նազիմի եւ դոկտոր Բեհաեթդին Շաքիրի ծրագիրը, որը ենթադրում էր «օսմանյան հայերի մեծ մասի ոչնչացում՝ վստահ լինելու համար, որ մնացած հայերի թիվը բավարար չի լինի անկախ հայրենիք ունենալու նպատակով պայքարի համար»:
«The Guardian»-ը նաեւ հիշեցնում է, որ թուրք հեղինակները, այդ թվում՝ Նոբելյան մրցանակակիր Օրհան Փամուքը, Հայոց ցեղասպանությունն ընդունելու համար մեղադրվել են պետական դավաճանության մեջ:
