Լաս Վեգասում Spring Valley Hospital Medical Center մասնավոր հիվանդանոցը պատահաբար տեղի լվացքատուն է ուղարկել վիժելու հետեւանքով մահացած երկվորյակ պտուղների մնացորդները։ Դրանք փաթաթված են եղել սպիտակեղենի մեջ եւ հայտնվել են լվացքի մեջ։

Լվացքատան աշխատակիցները ոստիկանություն են զանգել այն բանից հետո, երբ հայտնաբերել են պտուղների մնացորդները։ Ոստիկանության ներկայացուցիչը նշել է, որ հիվանդանոցի դեպքը պատահականություն է, եւ իրավիճակը կասկածելի չէ։ Ամեն դեպքում իրավապահներին հանձնարարել են հետաքննել միջադեպը, գրում է Americaru.com-ը։

Հիվանդանոցի  մամուլի խոսնակը հայտնել է, որ կինը վիժել էր իր երկվորյակ երեխաներին այլ հիվանդանոցում, բայց քանի որ ցանկացել է բուժումը շարունակել Spring Valley Hospital Medical Center-ում, նրան տեղափոխել են այնտեղ, իսկ նախքան նրա ժամանելը այնտեղ են ուղարկել նաեւ սպիտակեղենի մեջ փաթաթված երկվորյակների մնացորդները։ Հիվանդանոցի աշխատակիցները պարզում են, թե ինչպես են այդ մնացորդները հայտնվել լվացքի մեջ։