«Նուբարաշեն» ՔԿՀ-ի մոտ այսօր՝ մարտի 4-ին, հնչած կրակոցների հետեւանքով մահացած 3 անձինք կալանավայրի հետ կապ չեն ունեցել, կալանավորներ չեն եղել։ Այս մասին այսօր՝ մարտի 4-ին, դեպքի վայրում աշխատող լրագրողներին ասաց Երեւան քաղաքի ոստիկանապետ Աշոտ Կարապետյանը։
Քննչական կոմիտեից լրագրողներին տեղեկացրեցին, որ տարածքում եղած հսկող տեսախցիկներն առգրավել են, ուսումնասիրվում են տեսագրությունները։
Դեպքի առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով։
Ավելի վաղ NEWS.am-ը հաղորդել էր, որ կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով։ Երկուսն էլ մահացել են հիվանդանոցում։ Երրորդ սպանվածը՝ Մեսրոպ Մելիքյանը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։
Հիշեցնենք, որ ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ։ Հիվանդանոցից մեզ հայտնեցին, որ 2 երիտասարդներին իրենց մոտ տեղափոխել են արդեն հրազենային վնասվածքներից մահացած վիճակում։ Նախնական տեղեկություններով մի քանի հոգի կրակ են բացել «Նուբարաշեն» ՔԿՀ-ի մոտ եւ փախուստի դիմել։
Լուսանկարները՝ Արսեն Սարգսյանի/NEWS.am