Եվրոպական ժողովրդական կուսակցության դիրքորոշումը Հայոց ցեղասպանության հարցում պետք է տարածվի նաեւ Եվրամիության այլ ատյանների կառույցների՝ Եվրախորհրդարանի, Եվրահանձնաժողովի, Եվրոպայի խորհրդի խորհրդարանական վեհաժողովի եւ այլոց վրա։ Այս մասին NEWS.am-ի թղթակցի հետ զրույցում ասաց Հայ հեղափոխական դաշնակցության «Հայ Դատի» եւ քաղաքական հարցերի գրասենյակի ղեկավար Կիրո Մանոյանը։
Նրա խոսքով՝ ՀՅԴ-ն դրական է գնահատում Ցեղասպանության 100-ամյակի կապակցությամբ եվրոպական կուսակցությունների ազդեցիկ ընտանիքի՝ ԵԺԿ ընդունած բանաձեւը՝ հաշվի առնելով, որ կուսակցությունը մեծամասնություն է ներկայացնում Եվրախորհրդարանում, Եվրահանձնաժողովում եւ որը որոշ եվրոպական երկրներում իշխող կուսակցություն է։
«Երկրորդ, բանաձեւը իր բովանդակությամբ բավականին հաջող է։ Նրանում խոսվում է ոչ միայն Հայոց ցեղասպանության պատմական փաստի ճանաչման մասին, այլեւ հիշատակվում է Ցեղասպանության հետեւանքով Հայրենիքի կորուստը, խոսք է գնում փոխհատուցման մասին, թեպետ եւ դրա մասին լիակատար պատկերացում չի տրվում։ Ընդգծվում է, որ հայ եւ թուրք ժողովուրդների հաշտեցումը պետք է հիմնված լինի ճշմարտության վրա»,- արձանագրել է Մանոյանը՝ վստահություն հայտնելով, որ բանաձեւը վերջին քայլը չի լինելու։
«Բնականաբար պետք է շարունակել այս ուղղությամբ տարվող աշխատանքը։ Ցանկալի է, որ սա ուղղորդիչ լինի նաեւ այլ ուղղվածության կուսակցությունների համար։ Խոսքը գնում է սոցիալիստների, սոցիալ-դեմոկրատների մասին, որոնց կառույցներում մենք աշխատում ենք։ ՀՅԴ-ն Եվրոպական սոցիալական կուսակցության անդամ է եւ մենք աշխատանք ենք տանելու այդ ուղղությամբ։ ԵԺԿ բանաձեւը ինչ-որ չափով դրական ազդեցություն կարող է ունենալ այդ կուսակցությունների հետ մեր հարաբերությունների վրա։ Անկասկած, պետք է գնահատել նաեւ այն, որ մեր կուսակցությունները՝ Հայաստանի հանրապետական կուսակցությունը, «Օրինաց երկիրը» եւ «Ժառանգությունը», ի հեճուկս ներքին եւ արտաքին տարաձայնությունների, միասնական կերպով գովելի արդյունքի են հասել»,- եզրափակեց Մանոյանը։
