Քրեական հեղինակություն Թեւոսիկի եղբոր՝ Արթուր Սաֆարյանի սպանության գործով դատական առաջին նիստին այսօր՝ մարտի 4-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում, սպանությունը պատվիրելու, այնուհետեւ պատվերը կատարած Մովսես Ներսիսյանին սպանելու մեջ մեղադրվող Իսրայել Սարգսյանը (Իսո) հայտարարեց, որ իրեն մեղավոր չի համարում:
«Ես ինձ մեղավոր չեմ ճանաչում, մեղադրողը միայն ենթադրությունների վրա է խոսում»,-հայտարարեց ամբաստանյալը, երբ դատախազը ընթերցեց մեղադրական եզրակացությունը:
Դատավորը սահմանեց դատաքննության կարգը՝ հարցաքննել վկաներին, գործով առկա փաստաթղթերը հետազոտել, այնուհետեւ հարցաքննել գործով մեղադրյալին:
Այժմ դատարանում ցուցմունք են տալիս վկաները:
Հիշեցնենք, որ հունվարի 27-ին, անհայտ անձը Արամի նրբանցքի շենքերից մեկի մուտքի մոտ կրակել եւ սպանել էր 41-ամյա Արթուր Սաֆարյանին՝ քրեական հեղինակություն «Թեւոսիկի» եղբորը: Ոստիկանները գործով կալանավորել են Իսրայել Սարգսյանին, որը Գոռ Վարդանյանի գլխավորած «Դուքենդո» ֆեդերացիայի անդամներից է, եւ Տիգրան Ասատրյանին: Քրեական գործով պարզվել էր, որ Իսրայել Սարգսյանն իր ընկեր Մովսես Ներսիսյանին պատվիրել է կատարել Արթուր Սաֆարյանի սպանությունը, իսկ կատարելուց հետո Մովսեսին սպանել է եւ դին տեղափոխել է Քանաքեռավանի դաշտ եւ նետել կոյուղու դիտահորը: Իսրայել Սարգսյանին մեղադրանք է առաջադրվել ՀՀ քր-օրի 104 հոդվածի 1-ին մասի 11 կետի (սպանություն) եւ 235 հոդվածի 1-ին մասի (ապօրինի զենք-զինամթերք կրելը, պահելը, օգտագործելը) հատկանիշներով։