Սթենֆորդի համալսարանի գլոբալ հետազոտությունների կենտրոնը համաձայնել է հովանավորել երեք ուսանողների Ստամբուլ ուղեւորությունը՝ Հայոց ցեղասպանության զոհերի հիշատակի արարողություններին մասնակցելու համար: Այս մասին գրում է «Asbarez»-ը՝ վկայակոչելով «Project 2015» կազմակերպությանը:
«Ուրախ ենք, որ Ստենֆորդի համալսարանն աջակցելու է «Project 2015»-ի ջանքերին, որոնք ուղղված են այս տարվա ապրիլին Ստամբուլում Հայոց ցեղասպանության զոհերի հիշատակմանը»,- ասել է «Project 2015» շարժման անդամ Սիփան Բարսեղյանը՝ հույս հայտնելով, որ ուսանողները կօգտագործեն այդ հնարավորությունը եւ կմիանան պատմական միջոցառումներին:
«Մենք հույս ունենք, որ մյուս բուհերը նույնպես կհետեւեն Սթենֆորդի համալսարանի օրինակին եւ իրենց ուսանողների համար հասանելի կդարձնեն ուղեւորության համար ուսումնական վարկերն ու դրամաշնորհները՝ այդ միջոցառումներին մասնակցելու նպատակով»,- հավելել է Բարսեղյանը: