Չի կարելի անցնել կոռեկտության սահմանները՝ խոսելով Պերմյակովի գործի եւ Հայաստանի գլխավոր դատախազի մասին։ Ազգային Ժողովում նամն հայտարարություն է արել ՀՀԿ-ական պատգամավոր, պետաիրավական հարցերի հանձնաժողովի նախագահ Հովհաննես Սահակյանը։
Նա հայտարարել է, թե պետք չէ մտածել, որ Հայաստանի իրավապահ մարմինները ոչինչ չեն անում։ Խոսելով գլխավոր դատախազ Գեւորգ Կոստանյանի տված խոստման մասին, Սահակյանը նշեց, թե նրա խոսքը գործից չի տարբերվել։ «Նա խոստացավ, որ նամակ կգրի ՌԴ գլխավոր դատախազին եւ արեց դա»,- ասել է Սահակյանը։
Նա նշել է, թե գործի մանրամասներին չի տիրապետում, բայց վստահում է իրավապահներին։
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, ուր յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին:
