Արմավիրի մարզի Մեծամոր քաղաքի բնակչուհի, հղիության 5-րդ ամսում անցած տարվա ամռանը մահացած 28-ամյա Նարինե Շարոյանի գործով մեղադրյալ, գինեկոլոգ-մանկաբարձ Հասմիկ Հակոբյանն ապրիլի 1-ից աշխատանքից կազատվի: Այս մասին NEWS.am-ին ասաց «Արմավիր» բժշկական կենտրոնի տնօրեն Սարգիս Խաչատրյանը, որի աշխատակիցն է Հասմիկ Հակոբյանը:

Տնօրենի խոսքով՝ գինեկոլոգի աշխատանքից ազատվելը որեւէ առնչություն չունի հարուցված քրեական գործի եւ մեղադրանքի հետ:

«Պայմանագիրը լրանում է այս ամսվա վերջին, այդ պատճառով է աշխատանքից ազատվում, թե չէ մեղադրանքը կապ չունի»,- ասաց Սարգիս Խաչատրյանը:

Նշենք, որ դեպքի առթիվ նշանակված փորձաքննության պատասխանների համաձայն՝ կնոջ բոլոր հետազոտությունները հիվանդանոց ընդունվելուց անմիջապես հետո պետք է կազմակերպվեին ոչ թե ինֆեկցիոն, այլ մանկաբարձական բաժանմունքում: Ըստ փորձագետների՝ հետագայում ձեռնարկված համարժեք բուժական միջոցառումները արդյունք չեն տվել եւ հնարավոր չի եղել փրկել կնոջ կյանքը, քանի որ ինֆեկցիոն բաժանմունք տեղափոխելու պատճառով տրվել է նրա վիճակի ոչ ճիշտ գնահատական, ախտորոշումը եղել է ուշացած: Փետրվարի 27-ին «Արմավիր» ԲԿ-ի գինեկոլոգ-մանկաբարձ Հասմիկ Հակոբյանին մեղադրանք է առաջադրվել ՔՕ 130-րդ հոդվածի 2-րդ մասով, այն է՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում: Բժշկուհու նկատմամբ խափանման միջոց է ընտրվել ստորագրություն չհեռանալու մասին:

Հիշեցնենք, որ 2014 թվականի հուլիսի 7-ին քաղաքացի Գագիկ Մինասյանը հաղորդում էր ներկայացրել ոստիկանություն, որ իր կինը՝ Նարինե Շարոյանը, հունիսի 28-ին «Արմավիր» բժշկական կենտրոնում վիրահատության էր ենթարկվել, որի արդյունքում, բժիշկների կողմից իրենց մասնագիտական պարտականությունները ոչ պատշաճ կատարելու հետևանքով, վիրահատությունից 3 օր անց՝ հուլիսի 1-ին, նա «Արմենիա» բժշկական կենտրոնում մահացել է: 28-ամյա Նարինեն 7 տարեկան երեխա ուներ։