Գերմանացի ավտոարշավորդ Միխայել Շումախերի անձնական բժիշկ Յոհաննես Փրայլը կողոպուտի զոհ է դարձել։ Ինչպես գրում է գերմանական «Բիլդ» պարբերականը, անհայտ անձինք ներխուժել են նրա աշխատասենյակ եւ գողացել նրա իրերը։

Գողացած իրերի մեջ է նաեւ համակարգիչը՝ Շումախերի եւ այլ հիվանդների տեղեկություններով։ Բժիշկը դեռեւս չի հաստատել, թե մարզիկների վերաբերյալ կոնկրետ ինչ տեղեկություններ են հայտնվել չարագործների մոտ։ Տարվում է հետաքննություն, գրում է ՏԱՍՍ-ը։

Նշենք, որ սա Շումախերի մասին տեղեկությունների անհետացման առաջին դեպքը չէ։ Անցյալ տարվա ամռանը շվեյցարական «օդային շտապ օգնության» աշխատակիցները գողացել էին Շումախերի բժշկական քարտը եւ փորձել էին վաճառել այն։

Հիշեցնենք, որ 2013թ. վերջին Շումախերը գանգուղեղի վնասվածք էր  ստացել ֆրանսիական Մերիբելում լեռնադահուկային բազայում հանգստանալիս։ 2014թ. սեպտեմբերից նա վերականգնվում է իր շվեյցարական առանձնատանը։