Հայոց ցեղասպանության 100-րդ տարելիցին նվիրված միջոցառումների շրջանակում «Համազգային» հայ կրթական եւ մշակութային միության կողմից Վաշինգտոնի Սուրբ Խաչ Հայաստանյայց Առաքելական Եկեղեցու սրահում, փետրվարի 28-ին կազմակերպվել էր նյույորքաբնակ գործիչ Հրանտ Մարգարյանի նոր գրքի շնորհանդեսը: «Նահատակված հայ գրողները. 1915-1922թթ» անվանումը կրող գիրքն անգլերենով պատմում է Մեծ եղեռնի տարիներին նահատակ դարձած 13 հայ գրողների կյանքի ու գրական գործունեության մասին:
Երեկոյի մասնակիցներին ուղղված իր խոսքում ԱՄՆ-ում ՀՀ դեսպան Տիգրան Սարգսյանը բարձր գնահատեց հայկական մշակույթը օտարերկրյա լսարանին հասանելի դարձնելու նպատակին ծառայող ազգանվեր այս քայլը: «Հրանտ Մարգարյանի նախաձեռնությունն առավել կարեւոր է նաեւ ամերիկահայ համայնքի նոր սերնդին` հայ ժողովրդի գրական ժառանգությանը ծանոթացնելու տեսակետից»,- նշեց դեսպան Սարգսյանը:
Միջոցառման ժամանակ ներկայացվեցին հատվածներ հայ գրականության մեծերի` Սիամանթոյի, Ռուբեն Սեւակի, Դանիել Վարուժանի եւ այլոց ստեղծագործություններից:
