Վրացական լարիի փոխարժեքի կտրուկ նվազումը անուղղակի կազդի Հայաստանի տնտեսության վրա: Այս մասին NEWS.am-ի թղթակցի հետ զրույցում ասաց տնտեսագետ Արտակ Մանուկյանը:
Նա նշեց, որ վրացական լարին ՀՀ դրամից ավելի շատ է արժեզրկվել՝ մոտ 30 տոկոս: Տնտեսագետի կարծիքով՝ այս հանգամանքը ավելի քիչ ազդեցություն կունենա ՀՀ տնտեսության վրա, քանի որ Վրաստանում մեր առեւտրաշրջանառությունը միջնորդավորված է, այսինքն՝ Վրաստանը պարզապես տարանցիկ գոտի է: Լարիի արժեզրկումը կարող է ազդել էներգետիկ համակարգի վրա՝ հաշվի առնելով, որ ՀՀ-ն Վրաստանին էներգիա է վաճառում, իսկ վերջինս դա վերավաճառում է Թուրքիային:
Ազդեցության մյուս ոլորտն, ըստ տնտեսագետի, զբոսաշրջությունն է, առավել եւս, եթե հաշվի առնենք, որ առաջիկայում Նովրուզ է, եւ ուր գնալ հարցի առաջ կանգնած իրանցիները կընտրեն Վրաստանը: Արտակ Մանուկյանը նշեց, որ առանց այդ էլ մեզանում ծառայությունների որակի առումով կորուստ կար, իսկ այժմ վրացական ծառայությունները կդառնան ավելի մրցունակ, զբոսաշրջիկներն էլ ավելի ցածր արտարժույթային գներով հնարավորություն կունենան ավելի մատչելի ծառայություններ ձեռք բերել Վրաստանում: Այսպիսով, վրացական լարիի արժեզրկումը եւս պատճառ կդառնա Հայաստան, թե Վրաստան գնալու խնդրի առաջ կանգնած իրանցիներին ընտրել Վրաստանը:
