Գյումրիի քաղաքապետարանը արհեստական խոչընդոտներ է հարուցում «100-ամյակը առանց ռեժիմի» շարժման մարտի 7-ի՝ դեպի Գյումրի ավտոերթի ավարտին՝ ժամը 16:00-ին, տեղի Թատերական հրապարակում Գյումրեցիների եւ Շարժման առաջնորդ Ժիրայր Սէֆիլյանի հանդիպումը խափանելու նպատակով: Այս մասին հայտարարություն է տարածել Հիմնադիր խորհրդարանի քարտուղարությունը:
Հայտարարությունում նաեւ ասվում է.
«Սկզբում քաղաքապետարանն օրենքով սահմանված կարգով ներկայացված մեր իրազեկումը մերժել էր այն պատճառաբանությամբ, որ այդ օրը Ժառանգություն կուսակցությունն արդեն իրազեկել է նույն տեղում հավաք անցկացնելու մասին:
Այնուհետեւ՝ երբ «Ժառանգությունը» մեր խնդրանքով պաշտոնապես հրաժարվել է իր հավաքն անցկացնելուց, քաղաքապետարանը մերժել է մեր իրազեկումը վերանայելու դիմումը, պատճառաբանելով, որ նույն տեղում եւ նույն ժամին կազմակերպվում է մանկապատանեկան միջոցառում, ինչի համար քաղաքապետարանը համապատասխան խնդրանքով նախապես դիմել էր «Ժառանգություն» կուսակցությանը:
Մինչդեռ Ժառանգության հավաքի իրազեկումը ներկայացրած Արմեն Մարտիրոսյանը մեզ պաշտոնապես հավաստիացրեց, որ այդպիսի դիմում չի ստացել:
Կատարվածը փաստում է, որ Գյումրիի քաղաքապետարանի գործողություններն իրավաչափ չեն եւ իրականում ռեժիմի ցուցումով միտված են Շարժման քայլերը խափանելուն: Մասնավորապես՝ մեր միջոցառումը քաղաքական բնույթ ունի, ուստի պետք է առաջնահերթություն ունենա որեւէ այլ, այդ թվում՝ մշակութային միջոցառման նկատմամբ:
Վերը նշվածի հաշվառմամբ, ինչպես նաեւ նկատի ունենալով այն հանգամանքը, որ Թատերական հրապարակում նախատեսված միջոցառման մասնակիցները երեխաներ են, Գյումրեցիների եւ Ժիրայր Սէֆիլյանի հանդիպումը կազմակերպվում է այլ վայրում՝ Գյումրիի Սուրբ Ամենափրկիչ եկեղեցուն հարակից պուրակում՝ ժամը 16:00-ին»:
