ՌԴ մուտք գործելու արգելք ունեցող ավելի քան 5500 հայաստանցիներ արդեն դիմել են Միգրացիոն ծառայությանը՝ խնդրանքով, որ համաներում լինի եւ թույլատրվի նորից մեկնել արտագնա աշխատանքի: Այսօր՝ մարտի 5-ին, լրագրողների հետ զրույցում ՀՀ ՏԿԱԻՆ Միգրացիոն պետական ծառայության ղեկավար Գագիկ Եգանյանը հայտնեց, որ դիմումներն ամփոփելուց հետո կազմված փաթեթն ուղարկվում է ՌԴ:
«Ամբողջ գործընթացը տեւում է 2.5-3 ամիս: ՌԴ-ից ուղարկված պատասխանների 25%-ը դրական են, սակայն բոլոր այն դեպքերում, որտեղ առկա է դատարանի վճիռ, պատասխանում են, որ իրենք իրավասու չեն: Եթե հանենք նաեւ դատարանների վճիռ ունեցող դեպքերը, որ մենք ուղարկել ենք, ապա դրական ելքերի թիվը 30% է, այսինքն երեքից մեկին թույլատրվում է մեկնել ՌԴ»,- ասաց Գագիկ Եգանյանը:
Նրա խոսքով՝ ԵՏՄ անդամակցությունը այս դեպքում ոչնչով օգնել չի կարող, մինչդեռ դյուրացնում է աշխատանքային միգրանտների հատ կապված գործատույթները: Օրինակ, եթե Ուկրաինայի քաղաքացին ցանկանում է Ռուսաստանում աշխատանքային գործունեություն ծավալել, ապա պարտավոր է քննություն հանձնել ռուսերենից, Ռուսաստանի պատմությունից եւ սահմանադրական կարգից, 3 հիվանդությունների բացակայության մասին տեղեկանքներ ներկայացնել, պետական տուրք վճարել:
«Հայաստանի քաղաքացիների համար նշված կետերից ոչ մեկն անհրաժեշտ չէ»,- ասաց Գագիկ Եգանյանը:
Նշենք, որ ՌԴ մեկնելու արգելք ունեցող հայաստանցիների թիվը հասնում է մինչեւ 50 հազարի: Նրանք պարբերաբար ցույցեր են կազմակերպում Միգրացիոն ծառայության շենքի առջեւ:
