«Նավթոգազ Ուկրաինա»-ն մարտին ռուսական գազի մատակարարումների համար որպես կանխավճար 15 մլն դոլար է փոխանցել: Այս մասին լրագրողներին տեղեկացրել է «Գազպրոմ»-ի պաշտոնական ներկայացուցիչ Սերգեյ Կուպրիանովը:
«Այդ գումարը բավարար է 45.6 մլն խորանարդ մետր գազի, այսինքն՝ մատակարարումների ընթացիկ ծավալներով առնվազն եւս 5 օրվա համար»,- ասել է նա:
Նախկինում հաղորդվել էր, որ մարտի 4-ի դրությամբ Ուկրաինան 10 մլն խ.մ. ռուսական գազի հայտ է ներկայացրել: «Մարտի 4-ի ժամը 10:00-ի դրությամբ Ուկրաինան վճարել է 28.1 մլն խ.մ. գազի դիմաց: Ընթացիկ հայտը 10 մլն խ.մ.-ի համար է»,- ասել է Կուպրիանովը:
Ըստ ՏԱՍՍ-ի, նա հստակեցրել է, որ սա «Նավթոգազ»-ի հաշվարկած ծավալներն են, այսինքն՝ առանց հաշվի առնելով Դոնբասին մատակարարվող գազը:
Նախօրեին Ռուսաստանի նախագահ Վլադիմիր Պուտինը կառավարության անդամների հետ խորհրդակցության ժամանակ հայտարարել էր, որ Կիեւի վճարած գումարի դիմաց եւս երկու օր գազ կմատակարարվի, սակայն Ուկրաինան առայժմ ոչ մի քայլ չի ձեռնարկում: