ՊԲ արեւելյան ուղղությամբ տեղակայված զորամասերից մեկի պահպանության տեղամասի ԼՂՀ մարտական հենակետում մարտի 2-ի լույս 3-ի գիշերը հակառակորդի կողմից ստացած հրազենային վիրավորումից մահացած 20-ամյա Արսեն Կարապետյանին հուղարկավորել են այսօր՝ մարտի 5-ին, զինվորական կարգով: Այս մասին NEWS.am-ին ասաց հարեւանուհին՝ Լիդա Շահվերդյանը:
«Երեկ Արսենի հոգեհանգստյան արարողությունը տեղի ունեցավ, որին ներկա էր պաշտպանության նախարար Սեյրան Օհանյանը, Երեւանի քաղաքապետ Տարոն Մարգարյանը, բարձրաստիճան զինվորականներ, անծանոթ քաղաքացիներ»,- ասաց Լիդա Շահվերդյանը:
Նա հայտնեց, որ Արսենի Կարապետյանի մորը Սեյրան Օհանյանն անձամբ է հանձնել Բակո Սահակյանի կողմից տրված «Մարտական ծառայություն» մեդալը: Հարեւանուհին նաեւ նշեց, որ զինծառայողի մորը մեդալ է հանձնել նաեւ «Զինվոր» հասարակական կազմակերպությունների համակարգող խորհրդի նախագահ Մարգարիտա Խաչատրյանը:
Նշենք, որ ՊԲ օպերատիվ տվյալների համաձայն, մարտի 2-ին եւ լույս 3-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է շուրջ 200 անգամ, որի ընթացքում տարբեր տրամաչափի հրաձգային զինատեսակներից, ինչպես նաեւ 60 մմ ականանետերից ու ՌՊԳ-7 տիպի նռնականետերից հայ դիրքապահների ուղղությամբ արձակվել է ավելի քան 3000 կրակոց:
Խախտումների հետեւանով ՊԲ արեւելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից մահացու հրազենային վիրավորում է ստացել զինծառայող, 20-ամյա Արսեն Աբրեստի Կարապետյանը:
