2014 թվականին Beeline-ը Հայաստանում ներդրել է 14 մլն դոլար։ Այս մասին լրագրողներին մարտի 5-ին հայտարարեց «ԱրմենՏել»-ի  (Beeline ապրանքանիշ) գլխավոր տնօրեն Անդրեյ Պյատախինը՝ ներկայացնելով 2014թ. ընկերության արդյունքները։

Նրա խոսքով, 2014թ. աշխատանքի կարեւոր ուղղություններից մեկը ինտերնետի որակի բարելավումն է։ Այդ գերակայությունը պահպանվելու է նաեւ 2015 թվականին։ «Մենք կենտրոնացել ենք ուղիղ օպտիկական կապի վրա (FTTB), որն արդեն գործարկել ենք, դեռ Երեւանում։ Բացի այդ, 2014 թ. ապրիլին գործընկեր ընկերության հետ մեր հաճախորդների համար հասանելի դարձրինք IP-հեռուստատեսությունը։ Եթե խոսենք հեռախոսային կապի մասին, անցած տարվա ընթացքում ավելացրել ենք մարզերում թվայնացման մակարդակը։ Ողջ հանրապետությունում այդ ցուցանիշը այժմ կազմում է 87 տոկոս, իսկ Երեւանում հասել ենք 100 տոկոսի»,- նշել է Պյատախինը։

Նա խոստովանել է, որ անցած տարեվերջին փոխարժեքների աճը որոշակի դժվարություն ստեղծել է նախկինում նախանշված ծախսերի իրականացման համար, բայց, չնայած դրան, ընկերությունը շարունակում է ներդրումները։

«ԱրմենՏել»-ը Հայաստանի հեռահաղորդակցման կապի օպերատորներից եւ խոշոր հարկատուներից մեկն է։