Հանգուցյալ երգչուհի Ֆլորա Մարտիրոսյանի որդին դատական նիստի ժամանակ իրեն մեղավոր չի ճանաչել անցյալ շաբաթ Լոս Անջելեսում անօրինական փողոցային մրցարշավի ժամանակ իր մեքենայով վրաերթի ենթարկելու արդյունքում երկու հոգու սպանելու եւ մեկին վիրավորելու մեջ:
Ըստ «Los Angeles Times»-ի, Հենրի Մայքլ Գեւորգյանին մեղադրում են սպանության եւ ավտոմայրուղում ավտոմրցարշավի մասնակցելու մեջ, որը հանգեցրել է բախման: Հաջորդ դատալսումը նշանակված է մարտի 11-ին: Մեղավոր ճանաչվելու դեպքում Գեւորգյանին սպառնում է 33 տարուց մինչեւ ցմահ ազատազրկում նահանգի բանտում:
KTLA հեռուստաալիքի փոխանցմամբ, մեղադրյալի ընկերները վրդովմունք են հայտնել այդպիսի մեղադրանքների առնչությամբ՝ հայտարարելով, որ Գեւորգյանը մեքենայի ղեկին չի եղել: «Լուսանկարները, ականատեսներն ապացուցում են, որ նա չի եղել վարորդը: Չենք հասկանում, թե ինչպես են նման որոշում կայացնում միայն մեկ խորհրդավոր վկայի ցուցմունքի հիման վրա»,- ասել է ընկերներից մեկը:
Նշենք, որ Հենրի Մայքլ Գեւորգյանի փաստաբան Քեյթ Հարդին հայտարարել է, որ իր պաշտպանյալը չի եղել վթարի մասնակից Mustang ավտոմեքենայի ղեկին: Նրա խոսքով, մրցարշավի ժամանակ նկարահանված տեսանյութում երեւում է, որ Գեւորգյանը կանգնած է մեկնակետում գտնվող երկու մեքենաների մեջտեղում:
