Պաշտոնատար անձանց տների վրա հարձակումներ գործելու կամ այսպես կոչված «Բանդայի» գործով վերաքննիչ բողոքի քննության ժամանակ այսօր՝ մարտի 5-ին, 11 տարվա ազատազրկման դատապարտված Արթուր Մանուկյանի փաստաբան Ռաֆիկ Սաֆարյանը բացարկի միջնորդություն ներկայացրեց մեղադրողին: Փաստաբանը միջնորդությունը պատճառաբանվեց նրանով, որ մեղադրող Սասուն Խաչատրյանը անհիմն մեղադրանք է առաջադրել իր պաշտպանյալին:
Դատարանը խորհրդակցական սենյակից վերադառնալով՝ մերժեց Արթուր Մանուկյանի փաստաբանի միջնորդությունը:
Նշենք, որ այսօր մեղադրյալների փաստաբանները դատարանում ներկայացրին իրենց վերաքննիչ բողոքները:
Դատական նիստը հետաձգվեց: Հաջորդ նիստը կկայանա մարտի 9-ին:
Ինչպես ավելի վաղ հաղորդել էր NEWS.am-ը, Երեւանի Կենտրոն եւ Նորք Մարաշ համայնքների ընդհանուր իրավասության դատարանը դեկտեմբերի 26-ին «Բանդայի» պարագլուխ համարվող Արտուշ Հակոբյանին դատապարտեց 15, Դավիթ Գալստյանին եւ Սամվել Դավթյանին՝ նույնպես 15, Արթուր Մանուկյանին՝ 11 տարվա ազատազրկման՝ առանց գույքի բռնագրավման:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցագործության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Քյարամ Ամոյանը, Արթուր Մանուկյանը, Դավիթ Գալստյանը եւ Սամվել Դավթյանը մեղադրվում են բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու համար: Ամբաստանյալները պնդում են, որ իրենք մեղավոր չեն, գործը բարդել են իրենց վրա: