Բրիտանական Դերբի համալսարանի գիտնականներն առաջարկում են սմարթֆոն արտադրողներին, ինչպես նաեւ դրանց համար հավելվածներ ստեղծողներին ստիպել գնորդներին տեղեկացնել հոգեբանական հնարավոր կախվածության պատճառով առողջությանը վնաս հասցնելու հավանականության մասին:
Գիտնականների անհանգստության համար առիթ են դարձել իրենց անցկացրած հետազոտության արդյունքները: Ըստ RT-ի, պարզվել է, որ գիտափորձի մասնակիցները սմարթֆոնի էկրանների մոտ օրական միջինը շուրջ 3.6 ժամ են անցկացնում, ինչը հանգեցնում է սոցիալական եւ հոգեբանական խնդիրների, օրինակ՝ ինքնասիրահարվածության առաջացման, մտերիմների հետ հարաբերությունների խախտման:
«Մարդիկ պետք է իմանան նոր տեխնոլոգիաներից կախվածության առաջացման հնարավորության մասին: Նախազգուշացում կարող է արվել գնում կատարելուց առաջ կամ նոր հավելված ներբեռնելիս»,- հայտարարել է հետազոտության հեղինակներից Զահիր Հուսեյնը:
