Նեպալի լեռնագնացների ասոցիացիան Էվերեստի աղտոտման մասին ահազանգ է հնչեցնում: Լեռը տուժում է, քանի որ զբոսաշրջիկներն այն զուգարանի են վերածում, ինչը նպաստում է տարբեր հիվանդությունների տարածմանն ու շրջակա միջավայրի աղտոտմանը:
Ասոցիացիայի ղեկավար Անգ Տշերինգի խոսքով, Նեպալի իշխանությունները սկսել են զբոսաշրջիկներից պահանջել ճիշտ վերացնել իրենցից հետո թողած հետքերը: Սովորաբար աշխարհի ամենահայտնի բարձունքի այցելուները ձյան մեջ փոս են փորում, որը որպես զուգարան են օգտագործում:
Ըստ BCM-ի, գիտակից զբոսաշրջիկներն իրենց հետ զուգարանային պայուսակներ են բերում, որոնք օգտագործում են լեռը բարձրանալիս:
Նոր կանոնների համաձայն, բազային ճամբար վերադարձող յուրաքանչյուր զբոսաշրջիկ պետք է իր հետ 8 կգ թափոն իջեցնի: Փորձագետները հաշվարկել են, որ հենց այդքան են զբոսաշրջիկները ճամփորդությունից հետո թողնում իրենց հետեւից:
Լեռնագնացների խմբերը պետք է 4 հազար դոլարի չափով գրավ թողնեն: Սահմանված կանոնները խախտելու դեպքում նրանք կարող են զրկվել այդ գումարից:
