Երեւանի ավագանու «Բարգավաճ Հայաստան» խմբակցությունը աշխատում է նորմալ, բնականոն ռեժիմով: Այս մասին NEWS.am-ի թղթակցի հետ զրույցում ասաց խմբակցության ղեկավար Թամարա Պողոսյանը:
Նա նշեց, որ ավագանու անդամներից որեւէ մեկն այս պահին ԲՀԿ-ից դուրս գալու դիմում չի գրել, որեւէ մեկը խմբակցության ղեկավարին չի դիմել ոչ որպես անկուսակցական ավագանու անդամ գործունեությունը շարունակելու, ոչ էլ առհասարակ ավագանու կազմից դուրս գալու համար:
«Մենք սպասել ենք զարգացումներին, առաջիկայում էլ նախատեսված է հանդիպում ԲՀԿ ղեկավարության՝ Նաիրա Զոհրաբյանի, Վարդան Վարդանյանի եւ մնացածների հետ, կքննարկենք օրակարգի հարցերը, մի շարք հարցեր կան, կհստակեցվեն ժամանակի ընթացքում: Ավագանին չի կարող կուսակցության քաղաքական գծից դուրս լինել»,-ասաց Թամարա Պողոսյանը:
Ի դեպ, Երեւանի ավագանու հաջորդ նիստը նախատեսված է մարտի 18-ին:
Հիշեցնենք, որ Երեւանի ավագանիում ԲՀԿ խմբակցության անդամ է նաեւ Ռոբերտ Քոչարյանի եղբոր դուստրը՝ Իրինա Քոչարյանը:
Հիշեցնենք, որ մարտի 5-ին, տեղի է ունեցել ԲՀԿ արտահերթ համագումարը, որտեղ ԲՀԿ առաջնորդ Գագիկ Ծառուկյանը հայտարարել է ակտիվ քաղաքականությունից հեռանալու մասին: Նա հրաժարվել է կուսակցության ղեկավարի պաշտոնից, հայտարարել է նաեւ ԲՀԿ խմբակցության ղեկավարի պաշտոնից հեռանալու մասին:
Գագիկ Ծառուկյանն առաջարկել ԲՀԿ ղեկավարությունը վստահել Նաիրա Զոհրաբյանին: Վերջինս գրեթե միաձայն ընտրվել է ԲՀԿ վարչության նախագահ: Կուսակցության քաղխորհրդի քարտուղար է ընտրվել քաղաքաշինության նախկին նախարար Վարդան Վարդանյանը:
Վերջին օրերի ընթացքում ԲՀԿ խմբակցության 36 անդամներից կուսակցությունից հեռացել են 7-ը, այս պահին ԲՀԿ խմբակցությունում կա 29 պատգամավոր:
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։ Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում: