Տաջիկստանի ընդդիմադիր շարժման առաջնորդ Ումարալի Կուվատովի կնոջն ու 2 մանկահասակ երեխաներին հիվանդանոց են տեղափոխել թունավորման նախանշաններով։
Ստամբուլում սպանված քաղաքական գործչի կինն ու երեխաները գտնվում են քաղաքի հիվանդանոցներից մեկի վերակենդանացման բաժանմունքում։ Այս մասին հայտնել են սպանված քաղաքական գործչի հարազատները, գրում է BBC-ի ռուսական ծառայությունը։
«Երեկ երեկոյան քաղաքական գործիչը իր կնոջ եւ երեխաների հետ հյուր էր գնացել։ Ճաշից հետո Կուվատովն իրեն վատ էր զգացել, դուրս էր եկել փողոց, որտեղ նրան հրազենով սպանել էին։ Նրա կինն ու երեխաները հասցրել էին այդ մասին հայտնել իրենց հարազատներին եւ դրանից հետո կորցրել էին գիտակցությունը։ Հիվանդանոցից հայտնել են, որ ընտանիքի բոլոր անդամները, այդ թվում Կուվատովը, թունավորվել են»,- հայտարարել է Տաջիկստանի ընդդիմության ներկայացուցիչը։
«Խումբ 24» ընդդիմադիր շարժման առաջնորդ Ումարալի Կուվատովը հանդես էր գալիս Տաջիկստանի իշխանությունների սուր քննադատությամբ։ Նա արտագաղթել էր երկրից 2012թ.։
Թուրքիայում հաստատվելուց հետո Տաջիկստանի իշխանությունները Թուրքիայից բազմիցս պահանջում էին արտահանձնել քաղաքական գործչին։
Տաջիկստանի Գերագույն դատարանը 2014թ. հոտեմբերի 9-ին «Խումբ 24» կազմակերպությունը ճանաչել էր ծայրահեղական եւ արգելել նրա գործունեությունը իր պետության տարածքում։
Կուվատովի սպանությունը պաշտոնական Դուշանբեն դեռեւս չի մեկնաբանել։
