Հայաստանում ՌԴ ԱԴԾ Սահմանային վարչության պետ գեներալ-մայոր Վյաչեսլավ Բիրյուկովը հույս ունի, որ անհետացած սահմանապահ Արթուր Աֆյանը ողջ-առողջ է։
Մարտի 6-ին կայացած մամուլի ասուլիսի ժամանակ Բիրյուկովը հիշեցրեց, որ Աֆյանը հանգստյան օրվանից հետո չէր ներկայացել ծառայության։ Այդ մասին տեղյակ էին պահել զինվորական դատախազության մարմիններին։ Հայաստանի ԱԱԾ-ի ու Ոստիկանության հետ համատեղ որոնումներ են տարվել, սակայն ո՛չ զինծառայողի կինը եւ ո՛չ էլ ծնողները գործում պարզություն չեն կարողացել մտցնել։
Սահմանային վարչության պետը նշեց, որ ըստ առկա տեղեկությունների՝ Արթուր Աֆյանը պարտք էր ընկերներին եւ բանկերին։ «Կարծում եմ, որ նրա անհետացումը հենց սրա հետ է կապված»,- հայտարարեց Բիրյուկովը՝ հույս հայտնելով, որ Աֆյանին կգտնեն ողջ եւ առողջ։ Միաժամանակ գեներալ-մայորը հիշեցրեց, որ ինչքան շուտ նա հայտնվի, այնքան նրա օգտին կլինի արդարադատությունը։ Ըստ Բիրյուկովի՝ Արթուր Աֆյանին միայն դրական են բնութագրում, որեւէ կարգապահական տույժի նա չի ենթարկվել։
Նշենք, որ ավելի վաղ հայտնի էր դարձել, որ 26-ամյա պայմանագրային զինծառայող Արթուր Աֆյանը կորել էր փետրվարի 21-ին։ Նույն օրը Արթուր Աֆյանի կինը՝ Ալվարդ Մկրտչյանը դիմել էր Ոստիկանություն։ Կնոջ հավաստմամբ՝ հայտնել էր, որ ինքը հեռախոսազրույց է ունեցել իր ամուսնու հետ։ Արթուրը հրաժեշտ էր տվել կնոջը եւ ասել, որ այլեւս չի վերադառնալու։ Համաձայն օրենսդրության, եթե անհետացումից 10 օր անց քաղաքացին չի հայտնաբերվում, ապա հարուցվում է քրեական գործ։
Ըստ որոշ տեղեկությունների՝ ընտանիքը պարտքեր է ունեցել։ Սակայն Ալվարդ Մկրտչյանը պնդում է, որ ամուսնու անհետանալուց օրեր առաջ իրենք գրավ են դրել թանկարժեք իրերը պարտքերը մարելու համար։
