Սպառողական վարկերի վերաբերյալ օրենքով նախատեսված պահանջները կտարածվեն նաեւ գյուղատնտեսական ոչ մեծ վարկերի վրա: Կառավարությունն իր այսօրվա՝ մարտի 10-ի նիստում հավանություն է տվել «Սպառողական վարկավորման մասին» եւ «Արժութային կարգավորման եւ վերահսկողության մասին» օրենքների փոփոխությունների նախագծերին:
Ըստ այդմ, բանկերը պարտավորված կլինեն ներկայացնել ոչ միայն անվանական, այլեւ իրական տոկոսադրույքը մինչեւ 2 մլն դրամի գոյւղատնտեսական վարկերի դեպքում:
Օրինագիծը ներկայացնող ֆինանսների նախարար Գագիկ Խաչատրյանը նշել է, որ գյուղացիները ֆինանսական տեղեկացվածության առումով ռիսկի խմբում են, իսկ դա նշանակում է, որ նրանք միշտ չէ, որ տարբերում են անվանական տոկոսադրույքն իրականից: Ասվածը տեղին է նրանով, որ բանկերը հիմնականում գովազդում են հենց անվանական տոկոսադրույքը, իսկ իրականը, ոչ տոկոսային ծախսերով հանդերձ, կարող է մինչեւ 1,5 - 2,5 անգամ բարձր լինել:
Նշենք, որ գյուղատնտեսական վարկերի ընդհանուր պորտֆելը 2014-ին կազմել է 161,58 դրամ կամ բանկերի ընդհանուր պորտֆելի 6,37 տոկոսը եւ վարկային կազմակերպությունների 19,9 տոկոսը (45.78 մլրդ դրամ):