Հայ եւ ադրբեջանցի զինծառայողների կյանքը եւ կյանքի կորստի պարտականությունն ընկած է միայն Ադրբեջանի ղեկավարության վրա: Այս մասին NEWS.am-ին ասաց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը՝ անդրադառնալով մարտի 19-ին հակառակորդի ձեռնարկած դիվերսիային:
«Ադրբեջանի ղեկավարությունն է իր հայտարարություններով դրդում ադրբեջանցի զինվորներին նման դիվերսիաների, որի արդյունքում հենց իրենք մի քանի անգամ ավելի շատ կորուստներ են ունենում: Սա ապացուցում է, որ Ադրբեջանի ղեկավարության համար իրենց զինվորը ոչ մի գրոշ չունի»,- ասաց Շարմազանովը:
Նշենք, որ դիվերսիայի ժամանակ հակառակորդն ունեցել է առնվազն 12 զոհ:
Հիշեցնենք, որ մարտի 19-ին՝ ժամը 08:30-ի սահմաններում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում:
Ցավոք, հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են:
