Եվրասիական տնտեսական միությունը  հեռանկարներ չունի։ Այս մասին առցանց մամուլի ասուլիսի ժամանակ հայտարարել է ղազախստանցի քաղաքագետ  Այդոս Սարըմը։

NEWS.am-ի թղթակցի այն հարցին, թե մեկ տնտեսական կառույցում գտնվելու հանգամանքը որքանո՞վ կնպաստի Հայաստանի եւ Ղազախստանի տնտեսական հարաբերությունների զարգացմանը, Սարըմը պատասխանեց. «Այստեղ մտածելու եւ խոսելու բան կա։ Սակայն ես ավելի շուտ հոռետես եմ։ Դժվար թե Հայաստանը կարողանա խոշոր ներդրումներ կատարել Ղազախստանում։ Աշխատանքային ռեսուրսնե՞րը։ Այո, Ղազախստանում շատ հայեր են աշխատում, օրինակ՝ շինարարության ոլորտում։ Սակայն մենք շուտով գործազրկության հարցը առաջին պլան ենք բարձրացնելու։  Իսկ ի՞նչ եք կարծում, ո՞ւմ կցանկանան թողնել ղազախստանյան շուկայում. սեփակա՞ն, թե հայաստանցի լավ շինարարներին։ Ղազախները առաջիկա տարիների ընթացքում դժվար թե ներդրումներ կատարեն Հայաստանում։ Եւ գլխավորը, ինչը նրանց հետ է պահում, Ղարաբաղն է։ Ներկայիս իշխանությունների պարագայում եւ մտածելակերպով դուք չեք կարող կովկասյան Սինգապուր կառուցել»,- կարծիք է հայտնել քաղաքագետը։

Ինչ վերաբերում է ԵՏՄ-ում միասնական արժույթ ներմուծելու իրատեսությանը, Սարըմը ընդգծեց, որ չի հավատում դրան։ «Ես առհասարակ չեմ հավատում ԵՏՄ ապագային։ Լավագույն դեպքում այդ կազմակերպությանը նույն վախճանն է սպասում, ինչ ԱՊՀ-ին։ Իսկ միասնական արժույթը առանձին երազողների եւ ապուշների ցանկությունն է»,- ասել է ղազախ քաղաքագետը։