Ցավոք միջազգային որոշ առաջատար լրատվամիջոցներ հերթական անգամ զոհ գնացին ադրբեջանական պաշտոնական կեղծիքին, ծուղակն ընկնելով ու տարածելով ապատեղակատվություն: Այդ մասին ասվում է ՊՆ մամուլի քարտուղար Արծրուն Հովհաննիսյանի պարզաբանման մեջ։
«Այս կապակցությամբ պաշտոնապես հայտնում ենք, որ հայկական կողմը ինչպես միշտ տվել է ամփոփ եւ սպառիչ տեղեկատվություն ինչպես մարտական իրավիճակի, այնպես էլ դեպքի ու սեփական կորուստների վերաբերյալ:
Ժուռնալիստական էթիկան պահանջում է, որ տվյալ լրատվամիջոցները կողմերի կորուստների վերաբերյալ ճշտումներ անեն պաշտոնական աղբյուրներից, այլ ոչ թե կուրորեն կրկնեն ապատեղեկատվությամբ մշտապես աչքի ընկնող ադրբեջանական լրատվամիջոցներին:
Այս կապակցությամբ հերթական անգամ ստիպված ենք ընդգծել, որ հայկական կողմը, ավանդաբար բարձր գնահատելով հայրենիքի համար ամեն պահի կյանքը վտանգի ենթարկող իր որդիներից յուրաքանչյուրին, ի տարբերություն «մարտական խնդիրները» քանակի հաշվին եւ կորուստները հաշվի չառնելու գնով լուծող մեր հարեւանների, նրանցից ամեն մեկի կորստին արձագանքում է խորը վշտով ու ափսոսանքով եւ երբեք չի ուրանա նրանց անունն ու սխրագործությունը»,- նշել է Հովհաննիսյանը: