Արագածոտնի մարզի Աշտարակ քաղաքի «Սուրբ Գեւորգ» եկեղեցում այսօր` մարտի 21-ին, տեղի ունեցավ հակառակորդի դիվերսիոն գործողության հետեւանքով մարտի 19-ին զոհված զինծառայող Էդուարդ Հայարպետյանի հոգեհանգստյան արարողությունը:
Զոհվածի հոգեհանգստին ներկա էին ՊՆ պաշտոնյաներ, զինվորականներ, հարազատներ, ընկերներ:
«Ծնված օրվանից Էդուարդին ճանաչել եմ որպես մեր գյուղի լավ բալիկ, շատ լավ, խելացի երիտասարդ: Տարիներ առաջ մայրը երկու քրոջ եւ փոքր եղբոր հետ մեկնեց Ուկրաինա, ինքը հատուկ բանակ գնալու համար չմեկնեց, ասեց`պիտի մնամ, ծառայեմ հայրենիքին: Այդ ընթացքում, որ միշտ մայրը կանչում էր, ասում էր՝ մինչեւ չծառայեմ, չեմ գա»,- NEWS.am-ի հետ զրույցում ասաց Աշտարակ քաղաքի Մուղնիի թաղապետ Մնացական Գրիգորյանը:
Էդուարդ Հայրապետյանին կհուղարկավորեն վաղը Աշտարակի իրենց ընտանեկան գերեզմանատանը:
Նշենք, որ Արցախի նախագահ Բակո Սահակյանի հրամանագրով մարտի 19-ին ԼՂՀ պետական սահմանը պաշտպանելիս ցուցաբերած արիության համար զինծառայողներ Հակոբ Խաչատրյանը, Էդուարդ Հայրապետյանը եւ Արշակ Հարությունյանը հետմահու պարգեւատրվել են «Արիության համար» մեդալով:
Հիշեցնենք, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում:
Ցավոք, հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են:
