Շվեյցարիան պատրաստ է շարունակել աջակցել Հայաստանի եւ Թուրքիայի հարաբերությունների նորմալացմանը: Այս մասին, այսօր՝ մարտի 23-ին, լրագրողների հետ հանդիպման ժամանակ հայտարարել է Հայաստանում Շվեյցարիայի դեսպան Լուկաս Գասերը:
Անդրադառնալով 2009-ին Ցյուրիխում ստորագրված եւ Հայաստանի նախագահի կողմից հետ կանչված հայ-թուրքական արձանագրությունների մասին, դեսպանը նշել է, որ տեղյակ է դրանից: Նրա խոսքով՝ Շվեյցարիան պատրաստ է շարունակել միջնորդական ջանքերը, եթե կողմերը համապատասխան ցանկություն հայտնեն: Այդ համատեքստում դիվանագետը հիշեցրել է, որ Շվեյցարիան սերտ կապեր ունի Եւ Հայաստանի, եւ Թուրքիայի իշխանությունների հետ:
Հարցին, թե ինչ մակարդակով է Շվեյցարիան ներկա լինելու ապրիլի 24-ին Հայոց ցեղասպանության 100-րդ տարելիցի միջոցառումներին, դեսպանը պատասխանել է, որ այդ որոշումը կկայացվի մոտ ապագայում:
Հիշեցնենք, որ Թուրքիայի ապակառուցողական դիրքորոշման հետեւանքով, Հայաստանը հետ է կանչել հայ-թուրքական արձանագրությունները Հայաստանի ԱԺ-ից: